Home ಪುಸ್ತಕದ ಕುರಿತು ಧರಂಪಾಲರ ಚಿಂತನೆಯ ಪ್ರಸ್ತುತತೆ

ಧರಂಪಾಲರ ಚಿಂತನೆಯ ಪ್ರಸ್ತುತತೆ

by Harshith Joseph
79 views

ಗಾಂಧಿಯವರ ವಿಚಾರದ ಮೂಲಕ ಭಾರತೀಯ ಸಮಾಜವನ್ನು ಅರ್ಥೈಸುವ ಪ್ರಯತ್ನ ಮಾಡಿದ್ದ ಧರಂಪಾಲ್‌ರವರ ಜನ್ಮಶತಾಬ್ದಿಯ ವರ್ಷದಲ್ಲಿ ನಾವಿದ್ದೇವೆ. ಭಾರತವನ್ನು ಕುರಿತು ಬ್ರಿಟೀಷರು ದಾಖಲಿಸಿದ್ದ ವಿವರಗಳನ್ನು ಕ್ರಮಬದ್ಧವಾಗಿ ಅಧ್ಯಯನ ಮಾಡಿ, ಇಂದಿನ  ಸಾಮಾಜಿಕ ಸಮಸ್ಯೆಗಳನ್ನು ಹೇಗೆ ಗ್ರಹಿಸಬೇಕು ಎಂದು ಯೋಚಿಸಲು ಧರಂಪಾಲರು ನಮಗೆ ಮಾದರಿ.

ಧರಂಪಾಲರ ಆಲೋಚನೆಗಳಿಂದ ನಾವು ಏನನ್ನು ಕಲಿಯಬಹುದು ಎಂಬುದನ್ನು ಪ್ರಸ್ತುತ ರೈತರ ಹೋರಾಟದಿಂದ ಪ್ರಾರಂಭಿಸಿ ಯೋಚಿಸೋಣ. ರಾಷ್ಟ್ರ ರಾಜಧಾನಿಯಲ್ಲಿ ಗಣತಂತ್ರ ದಿನದಂದು ರೈತ ಚಳವಳಿಯಲ್ಲಿ ನಡೆದ ಹಿಂಸೆ ಈ ಹೋರಾಟದ ಪ್ರಸ್ತುತತೆ ಮತ್ತು ಅದರ ಭವಿಷ್ಯದ ಕುರಿತ ಪ್ರಶ್ನೆಗಳನ್ನು ಮೂಡಿಸಿದ್ದಂತೂ ಹೌದು. ಈ ಹಿನ್ನೆಲೆಯಲ್ಲಿ ರೈತ ನಾಯಕ ರಾಕೇಶ್ ಠಿಕಾಯತ್ ಸೇರಿದಂತೆ ಅನೇಕರು ಮಹಾಪಂಚಾಯತಿಯೊಂದನ್ನು ಏರ್ಪಡಿಸಿದರು. ಹೀಗೆ ಪಂಚಾಯತಿ ನಡೆಸಿದ್ದರಲ್ಲಿ ಹೊಸದೇನೂ ಇಲ್ಲ ಮತ್ತು ನಮ್ಮ ಅನುಭವದ ಜಗತ್ತಿನಲ್ಲಿ ಪಂಚಾಯತಿಗಳ ಮೂಲಕ ಸಮಸ್ಯೆಗಳನ್ನು ಬಗೆಹರಿಸಿಕೊಳ್ಳುವುದೇನೂ ಹೊಸದಲ್ಲ. ಆದರೆ ಇಲ್ಲಿ ಬಹಳ ಆಸಕ್ತಿದಾಯಕ ವಿಷಯವೊಂದಿದೆ. ಅದೆಂದರೆ, ಬುದ್ಧಿಜೀವಿಗಳು ಈ ಪಂಚಾಯತಿಗಳಲ್ಲಿ ಭಾಗವಹಿಸಿದ್ದಷ್ಟೇ ಅಲ್ಲ, ಈ ಪಂಚಾಯತಿಗಳಿಗೆ ಬೆಂಬಲವನ್ನೂ ವ್ಯಕ್ತಪಡಿಸಿದರು. ಇದರಲ್ಲಿ ಆಶ್ಚರ್ಯ ಏನಿದೆ ಎಂದು ನೀವು ಕೇಳಬಹುದು. ಕೆಲವು ವರ್ಷಗಳ ಹಿಂದೆ ಇದೇ ಬುದ್ಧಿಜೀವಿಗಳು ಈ ಪಂಚಾಯಿತಿಗಳನ್ನು ಕೋಮುವಾದ, ಸಂಪ್ರದಾಯವಾದ ಹಾಗು ಆಧುನಿಕ ಸಮಸ್ಯೆಗಳಿಗೆ ಪಂಚಾಯಿತಿಯ ಸಾಂಪ್ರದಾಯಿಕ ರೀತಿ-ರಿವಾಜುಗಳು ಸಲ್ಲದು ಮತ್ತು ಪಂಚಾಯತಿಗಳನ್ನು ನಿರ್ಮೂಲನೆ ಮಾಡಬೇಕು ಎಂದು ಖಾಪ್ ಪಂಚಾಯತಿಯ ಸಂದರ್ಭದಲ್ಲಿ ವಾದಿಸಿದ್ದನ್ನು ನಾವು ಗಮನಿಸಬೇಕು. ಅದಲ್ಲದೆ, ಖಾಪ್ ಪಂಚಾಯತಿಗಳಂತಹ ಪಂಚಾಯತಿಗಳನ್ನು ಕುರಿತು ಮಾತನಾಡುವುದೇ ಅನೈತಿಕ ಎನ್ನುವ ಮಟ್ಟಿಗೆ ವಾದವಿವಾದ, ಚರ್ಚೆಗಳು ನಡೆದಿದ್ದವು. ಖಾಪ್ ಪಂಚಾಯಿತಿಗಳನ್ನು ನಿಷೇಧಿಸಲಿ ಎಂದು ನ್ಯಾಯಾಲಯಕ್ಕೆ ಮೊರೆಹೋದ ಜನರೂ ಇದ್ದರು. ಆದರೆ ಇಂದು ರೈತಪರ ಹೋರಾಟದ ಸಂದರ್ಭದಲ್ಲಿ, ಬುದ್ಧಿಜೀವಿಗಳಿಗೆ ಎಲ್ಲಿಲ್ಲದ ಆಸಕ್ತಿಯು ಮಹಾಪಂಚಾಯಿತಿಯ ಬಗ್ಗೆ ಮೂಡಿರುವುದೇ ಅಚ್ಚರಿಯ ಸಂಗತಿಯಾಗಿದೆ. ಅಂದರೆ, ಪಂಚಾಯತಿ ಎಂದರೇನು? ನಮ್ಮ ಸಾಮಾಜಿಕ ಜೀವನದಲ್ಲಿ ಅದರ ಮಹತ್ವವೇನು? ಎಂದು ಅರ್ಥ ಮಾಡಿಕೊಳ್ಳದೆ, ತಮ್ಮ ರಾಜಕೀಯದ, ಅಸ್ಮಿತೆಯ ವಿಚಾರವನ್ನು ಎತ್ತಿಹಿಡಿಯುವ ಉದ್ದೇಶದಿಂದ ಒಮ್ಮೆ ಮಹಾಪಂಚಾಯಿತಿಯನ್ನು ನಿರ್ಮೂಲನೆ ಮಾಡಬೇಕೆಂತಲೂ ಮತ್ತೊಮ್ಮೆ ಮಹಾಪಂಚಾಯತಿ ನಡೆಯಬೇಕೆಂತಲೂ ವಾದಿಸುವ ಚಿಂತಕರ ಅಸಂಮಜಸ ವಾದಗಳು ಬೇಸರ ಮೂಡಿಸುತ್ತವೆ. ಪಂಚಾಯತಿ ಕರೆದದ್ದು ಸರಿಯೋ ತಪ್ಪೋ? ರೈತರ ಹೋರಾಟ ಸರಿಯೋ ತಪ್ಪೋ? ಈ ಪ್ರಶ್ನೆಗಳು ಪ್ರಸ್ತುತ ಲೇಖನಕ್ಕೆ ಪ್ರಮುಖವಲ್ಲ. ಧರಂಪಾಲರ ವಿಚಾರಗಳನ್ನು ಗಮನಿಸಿದರೆ, ಇಂದಿನ ಪ್ರಜಾತಂತ್ರದ ಆಡಳಿತದಡಿಯಲ್ಲಿ ರೂಪಿತವಾಗಿರುವ ಪಂಚಾಯತಿಗಳ ಕುರಿತು ಅವರು ಒಳನೋಟವನ್ನುಹೊಂದಿರುವಂತೆ ಕಾಣುತ್ತದೆ.

೧೯೫೯ರ ನಂತರ ರಾಜಸ್ಥಾನದಲ್ಲಿ, ತದನಂತರ ಆಂದ್ರಪ್ರದೇಶದಲ್ಲಿ ಪಂಚಾಯತ್ ರಾಜ್ ಕಾಯ್ದೆ ಬಂದಾಗ, ಅದರ ಮಿತಿಗಳನ್ನು, ಸಾಧ್ಯತೆಗಳನ್ನು ಗಮನಿಸಿದ ಧರಂಪಾಲರು ಕಾಯ್ದೆಯಡಿ ಬರಲಿದ್ದ ಪಂಚಾಯತಿಯನ್ನು ಕುರಿತು ಮೂಲಭೂತ ಪ್ರಶ್ನೆಗಳನ್ನು ಎತ್ತುತ್ತಾರೆ. ಈ ಸಂದರ್ಭದಲ್ಲಿ, ಪಂಚಾಯತ್ ರಾಜ್ ಕಾಯ್ದೆಯ ರಚನೆಗೆ ಪೂರಕವಾದ ಕಾನ್‌ಸ್ಟಿಟ್ಯು ಯೆಂಟ್ ಅಸೆಂಬ್ಲಿ ಚರ್ಚೆಗಲ್ಲಿ ಪಂಚಾಯಿತಿಯನ್ನು ಕುರಿತು ಹೇಗೆ ಚರ್ಚೆ ಮಾಡಲಾಗಿದೆ ಎಂಬುದರತ್ತ ತಮ್ಮ ಗಮನ ಹರಿಸುತ್ತಾರೆ. ಸ್ವತಂತ್ರ್ಯ ಹೋರಾಟದಲ್ಲಿ ಗಾಂಧಿಯವರ ಸ್ವರಾಜ್ ಕಲ್ಪನೆಯಲ್ಲಿ ಗ್ರಾಮಸ್ವರಾಜ್ ಕಲ್ಪನೆಯು ಕೇದ್ರವಾದದ್ದು ಎಂಬುದನ್ನು ಗುರುತಿಸಿಕೊಳ್ಳುತ್ತಾರೆ. ಇದರಲ್ಲಿ ಒಬ್ಬ ವ್ಯೆಕ್ತಿಯೊಡನೆ ಪ್ರಭುತ್ವವು ಯಾವುದೇ ರೀತಿಯಲ್ಲಿ ನೇರವಾದ ಸಂಪರ್ಕ ಇಟ್ಟುಕೊಳ್ಳದೆ, ಗ್ರಾಮಗಳಜೊತೆ ಹೇಗೆ ವ್ಯವಹರಿಸಬೇಕು ಹಾಗೂ ಪಂಚಾಯತಿಯನ್ನೂಳಗೊಂಡು ಗ್ರಾಮಗಳ ಕಾರ್ಯನಿರ್ವಹಣೆಯಲ್ಲಿ ಸರ್ಕಾರವು ಹೇಗೆ ಮತ್ತು ಎಷ್ಟರಮಟ್ಟಿಗೆ ಭಾಗವಹಿಸಬೇಕು ಎಂಬ ಗಾಂಧಿಯವರಿಗಿದ್ದ ಸ್ಪಷ್ಟ ಕಲ್ಪನೆಯನ್ನೂ ಗಮನಿಸುತ್ತಾರೆ. ಅದೇ ಸಂದರ್ಭದಲ್ಲಿ ಭಾರತದ ಪ್ರಗತಿಪರ ಚಿಂತಕರು ಗಾಂಧಿಯವರು ಮಾತನಾಡುತ್ತಿದ್ದ ಭಾರತದಲ್ಲಿನ ಪಂಚಾಯತಿ ವ್ಯವಸ್ಥೆಯು ಅಸಂಬದ್ಧ, ಅಪ್ರಸ್ತುತ, ವ್ಯಕ್ತಿ ಸಾತಂತ್ರ್ಯಕ್ಕ್ಕೆ ಅವಕಾಶ ಕೊಡದ ಮಾರಕ ವ್ಯವಸ್ಥೆ ಎಂದು ವಾದಿಸುವುದನ್ನೂ ಗುರುತಿಸಿಕೊಳ್ಳುತಾರೆ. ಹೀಗೆ ಭಾರತದಲ್ಲಿ ಆಡಳಿತವು ವಿಕೇಂದ್ರೀಕೃತವಾಗಿರತಕ್ಕದ್ದು ಎಂಬ ವಿಚಾರವನ್ನೂ ಒಳಗೊಂಡು ಕಾನ್ಸ್ಟಿಟುಯೆಂಟ್ ಅಸೆಂಬ್ಲಿ ಚರ್ಚೆಗಳಲ್ಲಿನ ಇನ್ನೂ ಅನೇಕ ವಿಚಾರಗಳನ್ನು ಅಧ್ಯಯನ ಮಾಡಿ “Panchayat Raj as the basis of Indian polity: An Exploration into the Proceedings of the Constituent Assembly” ಎಂಬ ಪುಸ್ತಕವನ್ನು ೧೯೬೨ರಲ್ಲಿ ಪ್ರಕಟಿಸುತ್ತಾರೆ.  ಕಾನ್ಸ್ಟಿಟುಯೆಂಟ್ ಅಸೆಂಬ್ಲಿ ಚರ್ಚೆಗಳನ್ನಾದರಿಸಿದ್ದ ಸಂವಿಧಾನದ ರಚನೆಗೆಂದು ನಿರ್ಮಿಸಲಾಗಿದ್ದ ಡ್ರಾಫ಼್ಟಿಂಗ್ ಕಮಿಟಿಯು, ಪಂಚಾಯತಿ ವ್ಯವಸ್ಥೆಯ ಸ್ವರೂಪವು ಭಾರತದ ಸಂವಿಧಾನದ ಸ್ವರೂಪಕ್ಕೆ ಸರಿಹೊಂದುವುದಿಲ್ಲ ಎಂದು ಗುರುತಿಸಿದ್ದನ್ನು ಧರಂಪಾಲರು ತಮ್ಮ ಈ ಪುಸ್ತಕದಲ್ಲಿ ಚರ್ಚಿಸುವುದನ್ನು ನೋಡಬಹುದು. ಅಲ್ಲದೆ, ಡ್ರಾಫ಼್ಟಿಂಗ್ ಕಮಿಟಿಯು ಭಾರತದ ಸಂವಿಧಾನದಲ್ಲಿ ಪಂಚಾಯಿತಿ ವ್ಯವಸ್ಥೆಯು ಹೇಗಿರಬೇಕು ಎಂದು ನಿರೂಪಿಸುತ್ತದೋ ಅದು ಗಾಂಧಿಯವರ ಗ್ರಾಮ ಸ್ವರಾಜ್ಯ ಕಲ್ಪನೆಗೆ ವಿರುದ್ಧವಾಗಿರುತ್ತದೆ ಎಂಬುದನ್ನೂ ಹೇಳುತ್ತಾರೆ. ಹಾಗೂ-ಹೀಗೂ ಅನೇಕ ವಾದ ವಿವಾದಗಳಾದಮೇಲೆ ಸಂವಿಧಾನವು ಗ್ರಾಮಪಂಚಾಯಿತಿಗಳು ಹೇಗೆ ಕಾರ್ಯನಿರ್ವಹಿಸಬೇಕು ಎಂಬುದನ್ನು ವಿಧಿ ೩೧-ಂ ನಲ್ಲಿ ಸೇರಿಸಿ ಕಥನವನ್ನು ಅವರು ಈ ಪುಸ್ತಕದಲ್ಲಿ ಗುರುತಿಸುತ್ತಾರೆ.

ಇಂದು ಸಂವಿಧಾನದ ವ್ಯವಸ್ಥೆಯಡಿಯಲ್ಲಿ ನಾವು ಪಂಚಾಯಿತಿಗಳು, ಆಡಳಿತದ, ಅಧಿಕಾರದ ವಿಕೇಂದ್ರೀಕರಣ ಎಂದು ಮಾತನಾಡುತ್ತೇವೆ. ಆದರೆ ಈ ಪಂಚಾಯಿತಿಗಳು ಗಾಂಧಿಯವರ ಕಲ್ಪನೆಗೆ ಅಥವಾ ಭಾರತಿಯರ ಬದುಕಿಗೆ ಪೂರಕವಾಗಿ ಕಾರ್ಯನಿರ್ವಹಿತ್ತದೆಯೋ ಎಂದು ಕೇಳಿದರೆ, ನಕಾರಾತ್ಮಕವಾದ ಉತ್ತರವು ನಮ್ಮ ಮುಂದೆ ಬಂದು ನಿಲ್ಲುತ್ತದೆ. ಇದೆ ಕಾರಣದಿಂದ ಜಯಪ್ರಕಾಶ್ ನಾರಾಯಣರವರು ತಮ್ಮ ಧರಂಪಾಲರ ಈ ಪುಸ್ತಕದ ಮುನ್ನುಡಿಯಲ್ಲಿ ಪಂಚಾಯತ್ ರಾಜ್ ಕಾಯ್ದೆಯನ್ನು ಉಗ್ರವಾಗಿ ಟೀಕಿಸುವುದನ್ನು ನೋಡಬಹುದು.

ಸ್ಥೂಲವಾಗಿ ಹೇಳಬೇಕೆಂದರೆ, ಭಾರತೀಯರು ತಮ್ಮ ಅನುಭವದ ಹಿನ್ನೆಯಲ್ಲಿ ಕಟ್ಟಿಕೊಳ್ಳಬಹುದಾದ ಸಾಮಾಜಿಕ ಬದುಕಿಗೆ ಯಾವುದು ಮಾರಕವೋ ಅದನ್ನೇ ಪಂಚಾಯತ್ ರಾಜ್ ಕಾಯ್ದೆಯು ಒದಗಿಸಿಕೊಡುತ್ತದೆ. ಉದಾಹರಣೆಗೆ ೧೯೪೭-೪೮ರ ಕಾಲ ಘಟ್ಟದಲ್ಲಿ, ಪಾಕಿಸ್ತಾನದಿಂದ ಬಂದ ನಿರಾಶ್ರಿತರಿಗೆ ಪಂಜಾಬ್ ಹರಿಯಾಣ ಭಾಗದಲ್ಲಿ ಆಶ್ರಯಕ್ಕೆ ವ್ಯವಸ್ಥೆಯನ್ನು ನಿರ್ಮಿಸಿಕೊಡುವ ಕಾರ್ಯದಲ್ಲಿ ತೊಡಗಿಸಿಕೊಂಡಿದ್ದ ಧರಂಪಾಲರು, ಭಾರತೀಯ ಸಮುದಾಯಗಳು ಆಡಳಿತದ ಹಸ್ತಕ್ಷೇಪವಿಲ್ಲದಿದ್ದರೆ ತಮ್ಮನ್ನು ತಾವೇ ಉತ್ತಮವಾದ ವ್ಯವಸ್ಥಿತ ರೀತಿಯಲ್ಲಿ ಬದುಕನ್ನು ಕಟ್ಟಿಕೊಳ್ಳಬಲ್ಲರು ಎಂಬುದನ್ನು ಗಮನಿಸುತ್ತಾರೆ.

ಒಂದೆಡೆ ಚುನಾಯಿತ ಕ್ರಮದಿಂದ ಸ್ಥಾಪಿತವಾದ ಪಂಚಾಯತ್ ರಾಜ್ ವ್ಯವಸ್ಥೆಯಿದೆ. ಇದಕ್ಕೆ ಸರ್ಕಾರ ಅನುದಾನವನ್ನು ನೀಡಿ ಅದನ್ನು ಪರಿಪಾಲಿಸುವ ವ್ಯವಸ್ಥೆಯನ್ನು ಮಾಡಿಕೊಟ್ಟಿದೆ. ವಿಪರ್ಯಾಸವೆಂದರೆ, ಇಲ್ಲಿ ಸರ್ಕಾರಿ ಅಧಿಕಾರಿಗಳೇ ಹೇಳುವ ಹಾಗೆ, ಸಮುದಾಯದವರಾರೂ ಭಾಗವಹಿಸುವುದಿಲ್ಲ. ಮತ್ತೊಂದೆಡೆ ನಮ್ಮ ಗ್ರಾಮಗಳಲ್ಲಿ, ಊರಿನ ದೇವಸ್ಥಾನ, ಮತ್ತಿತರೆ ಕಾಮಗಾರಿಗಳನ್ನು ನೋಡಿಕೊಳ್ಳುವ ಮತ್ತೊಂದು ಸಾಂಪ್ರದಾಯಿಕ ಪಂಚಾಯತ್ ವ್ಯವಸ್ಥೆ ಇದೆ. ಈ ಪಂಚಾಯತಿ ವ್ಯವಸ್ಥೆಯು ಪಾರಂಪರಿಕವಾದದ್ದು ಮಾತ್ರವಲ್ಲದೆ, ಸಮಸ್ಯೆಗಳನ್ನು ಬಗೆಹರಿಸುವ ನಿರ್ಣಾಯಕ ತೀರ್ಮಾನಗಳಿಗೆ ಬರುವ ವ್ಯವಸ್ಥೆಯೇ ಆಗಿದೆ. ಇದು ಜಾತಿ ಮತಗಳ ವಿಚಾರದಿಂದಾಚೆಗೆ ಜನರು ಒಬ್ಬರಿಗೊಬ್ಬರು ಕೈ ಜೋಡಿಸಿ ಹೆಗಲು ಕೊಟ್ಟು ಜೊತೆಯಲ್ಲಿ ನಿಲ್ಲುವ ರೀತಿಯದ್ದಾಗಿದೆ. ಈಗ ನಡೆಯುತ್ತಿರುವ ರೈತರ ಹೋರಾಟದ ಸಂದರ್ಭದಲ್ಲಾಗಲಿ ಅಥವಾ ಖಾಪ್ ಪಂಚಾಯತಿಯ ಸಂದರ್ಭದಲ್ಲಾಗಲಿ ಕರೆದ ಮಹಾಪಂಚಾಯತಿಯು ಈ ಪಾಂರಂಪರಿಕ ಪಂಚಾಯತಿಯ ಸ್ವರೂಪದ್ದೇ ಆಗಿದೆ.

ಒಟ್ಟಾರೆಯಾಗಿ ಹೊಸ ಚಿಂತನೆಯಿಂದ ಬಂದಿರುವ ಪಂಚಾಯತ್ ರಾಜ್ ಕಾಯ್ದೆ ನಮ್ಮ ಸಮಾಜಕ್ಕೆ ಅಹಿತಕರವಾದದ್ದಾಗಿದೆ. ಹಾಗೂ ಪಾರಂಪರಿಕವಾಗಿ, ನಮ್ಮ ಸಮಾಜದ ಜನರ ಅನುಭವದ ಹಿನ್ನೆಲೆಯಲ್ಲಿ ಬಂದಿರುವ ಮತ್ತೊಂದು ಪಂಚಾಯತಿ ವ್ಯವಸ್ಥೆಯು ಪರಿಣಾಮಕಾರಿಯಾಗಿ, ನಮ್ಮ ಸಾಮಾಜದ ವಾಸ್ತವವನ್ನು ಅರಿತು ಸಮಸ್ಯೆಗಳನ್ನು ಬಗೆಹರಿಸುವ ಕ್ರಮವನ್ನು ಹೊಂದಿದೆ ಎಂಬ ಈ ವ್ಯತ್ಯಾಸವನ್ನು ಧರಂಪಾಲರು ಕಂಡುಕೊಂಡಿದ್ದರು. ಈ ಕುರಿತು ಅವರು ವಿಸ್ತಾರವಾದ ಪುಸ್ತಕವನ್ನು ರಚಿಸಿ ಬ್ರಿಟಿಷ್ ದಾಖಲೆಗಳಲ್ಲಿ ಮದ್ರಾಸಿನ ಸುತ್ತಮುತ್ತ ೧೮ನೇ ಶತಮಾನ ಗ್ರಾಮ ವ್ಯವಸ್ಥೆಯ ಕುರಿತು ಒಂದು ಪುಸ್ತಕವನ್ನೇ ಬರೆದರು.

ಕೇವಲ ಪಂಚಾಯಿತಿ ವ್ಯವಸ್ಥೆಯಷ್ಟೆಯಲ್ಲದೆ ನಮ್ಮ ದೇಶದ ರಾಜಕೀಯ, ಸಾಂಸ್ಥಿಕ ಹಾಗೂ ಶೈಕ್ಷಣಿಕೆ ವಿಚಾರಗಳನ್ನೂ ಧರಂಪಾಲರು ದಾಖಲಾತಿಗಳೊಂದಿಗೆ ಅಧ್ಯಯನ ಮಾಡಿದವರಾಗಿದ್ದರು. ಗಾಂಧಿಯವರು ಭಾರತೀಯ ಸಮಾಜದ ಅಂತಃಸತ್ವವನ್ನು ಹೇಗೆ ಹಿಡಿದಿದ್ದರು ಮತ್ತು ಭಾರತೀಯರ ಮನಸ್ಥಿತಿಗೆ ಅದು ಹೇಗೆ ಹೊಂದಿಕೊಳ್ಳುತ್ತಿತ್ತು ಎಂಬುದನ್ನು ನಮಗೆ ಸ್ಪಷ್ಟ ಮಾಡುತ್ತಾರೆ. ಧರಂಪಾಲರ ಜನ್ಮಶತಾಬ್ದಿಯ ನೆಪದಲ್ಲಾದರೂ ಅವರ ವಿಚಾರಗಳನ್ನು ಕುರಿತು ಗಂಭೀರವಾದ ಅಧ್ಯಯನಗಳು ಆರಂಭವಾಗಬೇಕಿದೆ ಹಾಗೂ ಅಂತಹ ಅಧ್ಯಯನಗಳಲ್ಲಿ ಧರಂಪಾಲರನ್ನು ಹೊಗಳುವವರು, ಟೀಕಿಸುವವರು, ಎಲ್ಲಾ ಐಡಿಯಾಜಿ, ರಾಜಕೀಯ ಪಕ್ಷಗಳಿಗೆ ಸೇರಿದವರು ಭಾಗವಹಿಸಬೇಕು. ಧರಂಪಾಲರ ಜನ್ಮಶತಾಬ್ದಿಯ ಈ ಸಂದರ್ಭದಲ್ಲಿ, ರಾಷ್ಟ್ರೋತ್ಥಾನ ಸಾಹಿತ್ಯ ಪ್ರಕಾಶನವು ಅವರ ಐದು ಪ್ರಮುಖ ಬರಹಗಳನ್ನ ’ಧರಂಪಾಲ್ ಕ್ಲಾಸಿಕ್ಸ್ ಸೀರೀಸ್’ ಎಂಬ ಹೆಸರಿನಲ್ಲಿ ಪ್ರಕಟಿಸುತ್ತಿದೆ. ಅಂತೆಯೇ ಕುವೆಂಪು ಭಾಷಾಭಾರತಿ ಪ್ರಾಧಿಕಾರ ಕೂಡ ಮುಂದಿನ ಕೆಲವು ತಿಂಗಳುಗಳಲ್ಲಿ ಹನ್ನೆರಡು ಸಂಪುಟಗಳಲ್ಲಿ ಧರಂಪಾಲರ ಚಿಂತನೆಗಳ ಕನ್ನಡದ ಭಾಷಾಂತರವನ್ನು ಪ್ರಕಟಿಸುತ್ತಿದೆ. ಇದನ್ನು ಸದುಪಯೋಗ ಮಾಡಿಕೊಂಡು ಬುದ್ಧಿಜೀವಿಗಳು, ಕಾಲೇಜು ವಿದ್ಯಾರ್ಥಿಗಳು ಮತ್ತು ಇಚ್ಛೆಯುಳ್ಳ ಎಲ್ಲಾ ವರ್ಗದವರು ಧರಂಪಾಲರ ವಿಚಾರಗಳ ಹಿನ್ನೆಲೆಯಲ್ಲಿ, ೨೧ನೇ ಶತಮಾನದ ಭಾರತೀಯ ಸಮಾಜದ ಸಮಸ್ಯೆಗಳನ್ನು ಕುರಿತು ಸಮಾಲೋಚಿಸಲು ಸಾಧ್ಯವೇ ಎಂಬ ಪ್ರಶ್ನೆಯನಿಟ್ಟುಕೊಂಡು ಉತ್ತರವನ್ನು ಹುಡುಕವತ್ತ ಸಾಗುವುದು ಇಂದಿನ ಜರೂರು.

Author

  • ಹರ್ಷಿತ್ ಜೋಸೆಫ಼್ ರವರು ಪ್ರಸ್ತುತ India Studies Unit, CESS ನಲ್ಲಿ ಫ಼ೆಲೊ ಆಗಿ ಕಾರ್ಯ ನಿರ್ವಹಿಸುತಿದ್ದಾರೆ. ಸಾಂಸ್ಕೃತಿಕ ಭಿನ್ನತೆಯ ಹಿನ್ನೆಲೆಯಲ್ಲಿ ಭಾಷಾಂತರದ ಸಮಸ್ಯೆಯನ್ನು ಅರ್ಥೈಸಿಕೊಳ್ಳುವುದು ಅವರ ಸಂಶೋಧನೆಯಾಗಿದೆ.

You may also like

Leave a Comment